Голем прекин на интернетот влијаеше на десетици веб-страници, банки, онлајн игри и апликации, вклучувајќи ги Amazon, Snapchat и Vodafone.
Проблемите започнаа утрово и се чини дека се поврзани со тешкотии со услугата Amazon Web Services (AWS), објави Sky News. Компанијата соопшти дека „итно работи на решавање на проблемот“.
Компанијата, исто така, објави на својата страница за следење на статусот на услугата дека бележи зголемена стапка на грешки и доцнења во работењето на неколку AWS услуги.
Според податоците од веб-страницата Downdetector, само во САД се регистрирани повеќе од 2.000 извештаи поврзани со прекинот на системот Amazon Web Services.
Меѓу апликациите и услугите погодени од проблемите се, покрај веќе споменатите, Ring, Clash Royale, Life360, MyFitnessPal, Xero, Amazon Music, Tidal, Fortnite, IMDB, Zoom, Epic Games Store, WhatsApp, Prime Video, Clash of Clans, Wordle, Coinbase, Canva, AFP, HMRC, Vodafone, PlayStation, Pokémon Go…
Корисниците на големите банки исто така имаат проблеми бидејќи Llyds Bank, Halifax и Bank of Scotland во моментов не работат.
Сè потсетува на минатата година
Во јули минатата година, глобален ИТ дефект предизвика откажување на летови низ целиот свет и го наруши работењето на бројни индустрии, вклучувајќи банки, здравствени установи, медиумски куќи и хотелски синџири.
Прекинот ги прекина интернет услугите, зафаќајќи околу 8,5 милиони уреди што работат со оперативниот систем Microsoft Windows.
И сè започна со погрешно ажурирање на софтверот во американската компанија за сајбер безбедност – CrowdStrike.
Amazon Web Services е најголемиот светски провајдер на услуги за cloud computing. Обезбедува низа услуги за интернет инфраструктура што им овозможуваат на компаниите да изнајмуваат компјутери и сервери за да ги извршуваат своите апликации и веб-страници.
Како такви, сите проблеми во AWS можат да имаат големо влијание врз поголемиот дел од остатокот од интернетот, предизвикувајќи веб-страниците што можеби немаат очигледна врска со самиот Amazon да паднат.
