Властите во Велика Британија го испитуваат принцот Ендру откако се појавија извештаи дека тој побарал од полицаец за заштита да ископа информации за покојната Вирџинија Џуфре.
Наводно, членот на кралското семејство му рекол на заменик-секретарот за печат на неговата покојна мајка, кралицата Елизабета Втора, дека во 2011 година му го дал американскиот број на социјално осигурување и датумот на раѓање на Џуфре за да го провери нејзиното наводно кривично досие, според „Мејл он Сандеј“.
Според весникот, тој наводно го испратил мејлот кратко пред да биде објавена фотографијата од 2001 година на која тој е со раката обвиткана околу половината на Џуфре кога таа имала 17 години. Поранешната девојка на Џефри Епштајн, Гислен Максвел, исто така била на сликата.
Не е јасно дали полицаецот го исполнил барањето на Ендру.
Ед Милибанд, британскиот министер за енергетика, ја нарече преписката „длабоко загрижувачка“, гарантирајќи дека обвинувањата ќе бидат истражени.
Во меѓувреме, семејството на Џуфре коментираше за обвинувањата, изјавувајќи за медиумот дека е-поштата „открива до кој степен оние кои се вмешани се обидуваат да ги дискредитираат и оцрнат преживеаните“, алудирајќи на нејзините обвинувања за сексуален напад на Ендру.
– Вистината ќе излезе на виделина и нема да има сенки во кои тие ќе можат да се скријат – додава семејството.
Џуфре изврши самоубиство во април 2025 година на 41-годишна возраст, откако со години го обвинуваше 65-годишниот Ендру за сексуален напад, тврдејќи дека бил вмешан во мрежата на сексуална трговија на Епштајн и дека ја силувал кога била малолетничка.
Таа поднесе формална тужба против поранешниот војвода од Јорк во 2021 година, а случајот беше решен надвор од судницата во 2022 година со околу 12 милиони долари.
Во тоа време, Ендру ги негираше обвинувањата, но кралицата Елизабета му ги одзеде воените почести.
Претходните е-пораки на Ендрју беа објавени неколку дена откако тој и неговата поранешна сопруга, Сара Фергусон, беа лишени од кралските титули поради „континуирани обвинувања“ дека е поврзан со Епштајн.
– Одлучив, како и секогаш, да ја ставам должноста кон моето семејство и земјата на прво место – напиша тој во изјава.
Ендрју продолжи да ги негира обвинувањата против него, но сподели дека одлуката е донесена по разговор со неговиот брат, кралот Чарлс III, и нивното „непосредно и пошироко семејство“.
ФОТО: EPA / RICHARD WAINWRIGHT
