Цената на златото оваа недела порасна за дополнителни 5% откако повторно се разгоре трговската војна меѓу САД и Кина и случувањата околу основните каматни стапки во САД.
Цената на овој благороден метал утрово во 5 часот достигна врв надминувајќи 4.242 долари за унца, со што продолжи растот почнат во август.
Сега, на берзите цената се задржува околу 4.224 долари за унца.
Аналитичарите велат дека голем придонес за растот на цената на златото е неизвесноста околу идната политика на централната банка на САД, односите меѓу САД и Кина кои се влошуваат и заклучувањето на американската влада.
Претседателот на Федералните резерви на САД, Џером Пауел, оваа недела навести дека се на добар пат да спроведат едно намалување на каматите за четвртина процентен поен овој месец. Пониските каматни стапки обично се во корист на скапоцените метали, бидејќи тие не генерираат приходи од камати.
Претседателот на САД, Доналд Трамп, изјави дека САД сега се „заробени“ во трговска војна со Кина, предизвикувајќи стравувања од долгорочни последици за глобалната економија – дополнително зајакнувајќи ја привлечноста на златото како безбедно засолниште.
Во исто време, секретарот за финансии на САД, Скот Бесент, предложи подолга пауза пред какво било понатамошно зголемување на царините.
Сегашната блокада на американската влада, исто така, придонесе за порастот на цената на златото, како и за таканаречената трговија со девалвација, каде што инвеститорите бегаат од државните обврзници и валутите за да се заштитат од растечките буџетски дефицити.
Дополнителен импулс даде зголеменото купување злато од страна на централните банки, што помогна за раст од повеќе од 60% од почетокот на годината.
