Пациент го удирал докторот кој му укажувал помош, а потоа и полицијата

Пациент од тетовското село Челопек направил вистински хаос во Клиничката болница во Тетово, откако агресивно се однесувал кон медицинскиот персонал, а потоа физички го нападнал лекарот кој се обидувал да му помогне.

Инцидентот се случил вчера попладне, кога 28-годишниот М. М. бил примен во болницата, но наместо да соработува со докторите, почнал да вика и да создава вознемиреност во просториите на установата.

Според информациите од полицијата, во моментот кога докторот Л. А. (31) од село Желино се обидел да му укаже медицинска помош, пациентот го нападнал и му нанел удари.

- Advertisement -

По пријавата од болницата, на местото пристигнала полициска екипа, но и тогаш насилното однесување не престанало.

„На 14.10.2025 во 16 часот, полициски службеници од СВР Тетово го лишија од слобода М. М. (28) од Челопек, постапувајќи по пријава дека агресивно се однесувал кон персоналот и физички го нападнал лекарот. Исто така, по пристигнувањето на полициските службеници, тој агресивно се однесувал и кон нив и физички нападнал еден од полицајците“, соопштија од СВР Тетово.

По инцидентот, пациентот е задржан во полициска станица, а случајот е целосно документиран. Против него ќе биде поднесена соодветна кривична пријава.