Николоски најави дека ќе одговараат сите од СДСМ, ДУИ и од Левица што ја злоупотребиле власта

Вицепремиерот и министер за транспорт Александар Николоски вели дека по локалните избори нема да се одржат предвремени парламентарни избори и најавува дека фокусот ќе биде на расчистување во судството и во обвинителството и одговорност од сите што ја злоупотребиле власта од т.н. „црна коалиција на СДСМ, ДУИ и Левица“.

Предвремени избори ќе нема, имаме стабилна коалициска влада, која функционира одлично, изјави денеска Николоски, при посетата на Гостивар во рамки на кампањата за локалните избори.

Според Николоски, мандатот на владата ќе биде до 2028 година и тогаш ќе бидат и следните парламентарни избори.

- Advertisement -

– Разликата помеѓу нас и црната коалиција на СДСМ, ДУИ и Левица е што ние зборуваме за проекти, не можеме да се доискажеме колку проекти имаме, а од другата страна има празни зборови и манипулација и постојана жед и желба за власт. Минатата година отидоа во опозиција, само една година и три месеци се поминати откако се во опзиција и не можат да додржат да останат во опозиција и цело време – предвремени избори, предвремени избори. Кога некој толку многу бара предвремени избори тоа значи дека него го интересираат само привилегиите од власта, а нив ги интересира и криминалот од власта – рече Николоски.

Нема, дополни тој, да се занимаваме со предвремени избори, туку со расчистување во судството и обвинителството и сите кои ја злоупотребија власта од т.н. црна коалиција на СДСМ, ДУИ и Левица ќе одговараат по завршување на овие избори.

– Тоа е фокус број еден по завршување на изборите – нагласи Николоски.