Бајовски вети мултифункционален спортски објект во општината

Нов мултифункционален објект од 4.000 метри квадратни во Чучер Сандево ќе биде стратешка инвестиција која ќе го промени секојдневниот живот во општината, вели кандидатот за градоначалник од ВМРО-ДПМНЕ Зоран Бајовски.

– Оваа модерна спортско-културна хала ќе обезбеди услови за организирање натпревари, тренинзи, културни настани и локални промоции, а го намалува одливот на граѓани и ја зацврстува социјалната и економската кохезија во заедницата. Креирањето нови работни места е и непосредна потреба: изградбата и функционирањето на објектот ќе создадат нови работни места во градежништвото, услугите, управувањето и спортската инфраструктура, а локалните претпријатија ќе добијат повеќе активности и приходи. Со оваа инвестиција, Чучер Сандево ќе стане попривлечна средина за младите семејства и компании – додаде тој.

Според него, Чучер Сандево може да биде инкубатор на нови шампиони кои ќе ги носат боите на општината и на државата.

- Advertisement -

– Овој објект не е луксуз, туку инвестиција во иднината на нашата младина и во економскиот развој на општината. Ќе работам транспарентно и со отчетност за да ги претвориме овие планови во реалност. Времето за промени е сега. Заедно можеме да изградиме инфраструктура што останува за генерации – додаде тој.

Бајовски ги повика граѓаните да го заокружат бројот 9 на 19 октомври.