Последните 13 живи заложници кои беа држени од Хамас во Појасот Газа се ослободени и предадени на Меѓународниот комитет на Црвениот крст, јавуваат израелските медиуми. Претходно изутринава беа ослободени седум киднапирани Израелци, што значи дека после 738 денови заточеништво, Хамас веќе не држи живи заложници во Газа.
Некои од заложниците успеале да остварат краток видеоразговор со своите семејства непосредно пред ослободувањето, а снимките од тие моменти се појавија и на социјалните мрежи. За многумина од нив тоа било прво визуелно гледање со роднините по повеќе од две години заробеништво, време во кое беа целосно изолирани од надворешниот свет.
Видеата се оценуваат како пропаганден потег на Хамас, со кој групата настојува да се претстави како хумана. На некои снимки се забележуваат вооружени припадници на Хамас во позадина.
За да се избегне таква медиумска експлоатација, овојпат предавањата биле извршени без церемонии и без присуство на медиуми.
– Сите доаѓате дома – сите! – изјавила низ солзи Ејнав Зангаукер, мајка на еден од заложниците, цитирана од Тајмс оф Израел. „Војната заврши.“
Израелските одбранбени сили (ИДФ) утрово ги објавија првите фотографии од заложниците ослободени од Хамас, кои подоцна беа предадени на израелската војска. На фотографиите е и Алон Охел, талентиран пијанист кој студирал џез во Тел Авив, како и близнаците Гали и Зив Берман како се прегрнуваат по нивното ослободување.
Медиумите објавија и фотографии на други ослободени заложници – браќата Давид и Ариел Кунио и Нимрод Коен – како преку видеоразговор зборуваат со своите семејства.
– Не можев ништо да слушнам, но ги видов и тоа е доволно – рекла мајката на браќата Кунио.
Во следните часови се очекува ослободување и на 250 палестински затвореници и 1.700 лица задржани во Газа, меѓу кои и 22 деца.
Според израелските медиуми, затворениците се подготвуваат за напуштање на затворот Офер, лоциран на окупираниот Западен Брег. Десетици семејства од утринските часови чекаат пред затворот да ги пречекаат своите блиски. Според планот, околу 100 затвореници ќе бидат ослободени на Западниот Брег, други ќе бидат депортирани во Газа или Египет, а мал дел ќе биде ослободен во Источен Ерусалим.
Претседателот на САД, Доналд Трамп, прогласи дека „војната е завршена“ додека патува на Блискиот Исток. Трамп ќе се обрати пред израелскиот парламент, а потоа ќе отпатува во египетското одморалиште Шарм ел Шеик, каде што ќе предводи мировен самит на кој ќе присуствуваат најмалку 20 светски лидери.
