Србин е избран за потпретседател

Косовскиот Парламент денеска беше конституиран, осум месеци по парламентарните избори, со изборот на косовскиот Србин Ненад Рашиќ, лидер на Граѓанската иницијатива „За слобода, правда и опстанок“, за потпретседател на Собранието, јави весникот Коха диторе.

Рашиќ е претседател на партијата За слобода, правда и опстанок, која има само еден мандат во парламентот, додека девет од 10-те мандати што им се гарантирани на Србите ги има Српска листа. Тој е министер за заедници и враќање во оставка и е петти, последен потпретседател на Парламентот. Останатите четворица беа избрани уште на 26 август.

Рашиќ доби поддршка од 71 пратеник, девет беа против, а 24 воздржани. Според Уставот, петтиот потпретседател мора да биде од српската заедница, но претходните кандидати не добија доволно гласови.

- Advertisement -

Политичката криза започна по изборите на 9 февруари, кога ниту една партија не обезбеди мнозинство во 120-члениот парламент, што доведе до повеќемесечна блокада.

Уставниот суд на Косово неодамна наложи Собранието да се конституира најдоцна 12 дена по објавувањето на пресудата на 8 октомври, со што денешниот избор на Рашиќ го означи крајот на институционалниот застој.