Францускиот претседател Емануел Макрон „ќе именува премиер во рок од 48 часа“ врз основа на заклучоците од разговорите што ги водел премиерот во заминување Себастијан Лекорну со различни политички сили, објави канцеларијата на францускиот шеф на државата во среда.
Непосредно пред тоа, Себастијан Лекорну процени дека назначувањето на нов премиер ќе се случи во рок од 48 часа со цел да се избегне распуштање на Националното собрание.
Претседателот „ги зеде предвид заклучоците на Себастијан Лекорну“: „мнозинство пратеници против распуштање (на парламентот), постоење платформа за стабилност и можен пат за усвојување на буџетот до 31 декември“, додаде канцеларијата на францускиот претседател.
Себастијан Лекорну, петтиот премиер на Франција во последните две години, поднесе оставка во понеделник, само неколку часа откако го објави составот на својата влада, што ја прави најкратковечната администрација во поновата француска историја.
Но, на барање на претседателот Макрон, Лекорну одржа дополнителни консултации со политичките лидери од левицата до централно-десниот дел во обид да ја смири кризата и да избегне предвремени парламентарни избори.
„Му кажав на претседателот дека верувам дека ситуацијата дозволува назначување премиер во следните 48 часа“, изјави Лекорну за Франс 2 откако го информираше Макрон за неговите разговори.
