Израелскиот премиер Бенјамин Нетанјаху изјави дека Иран развива интерконтинентални балистички ракети што можат да стигнат до американски градови како Њујорк, Бостон, Вашингтон или Мајами и да бидат во дострел на нуклеарни напади, и додаде дека конфликтот во Газа се ближи кон крајот.
– Иран може да го уценува кој било американски град. Луѓето не веруваат во тоа. Иран развива интерконтинентални ракети со дострел од 8.000 километри, додадете уште 3.000, и тие можат да стигнат до источниот брег на САД – нагласи Нетанјаху за време на разговор во подкастот на Бен Шапиро, објави израелскиот „Џерусалем пост“.
Нетанјаху, исто така, изјави дека наводните ирански ракети претставуваат голем ризик, додавајќи дека „Израел направи одлична работа во спречувањето на таа опасност“.
Израелскиот премиер, исто така, откри дека Израел развива офанзивно оружје заедно со САД, што ниедна друга суперсила во светот го нема.
– Најнапредното оружје на планетата го развива Израел и го споделува со Америка – рече тој.
Зборувајќи за војната во Газа, Нетанјаху изрази верување дека крајот на конфликтот се ближи, но нагласи дека тоа нема да биде можно доколку Хамас остане на власт по воспоставувањето на прекинот на огнот.
– Мислам дека сме блиску до крајот на војната, но сè уште не сме таму. Пред точно две години, беше извршено најлошото страдање на Евреите од Холокаустот. По тој ужасен ден, Израел се појави како најголема сила на Блискиот Исток, но сè уште имаме работа за да ја завршиме мисијата. Она што започна во Газа мора да се заврши во Газа со ослободување на 46 наши заложници, од кои 20 сѐ уште се живи, и со крај на владеењето на Хамас – рече Нетанјаху.
