Денес и официјално започнува кампањата за локалните избори 2025 година, со што политичките партии излегуваат пред граѓаните со своите програми и кандидати за градоначалници и советници.
Со почетокот на изборната кампања, улиците низ Македонија се полни со билборди, плакати и избирачки пораки, додека политичките лидери ја интензивираат својата комуникација со електоратот. Граѓаните во следните недели ќе имаат прилика да ги слушнат ветувањата и приоритетите на кандидатите за локалната власт.
Рекорден број кандидати
До општинските изборни комисии се поднесени вкупно 312 листи на кандидати за градоначалници и 575 листи на кандидати за советници во 80-те општини и Градот Скопје. Државната изборна комисија потврди вкупно 861 кандидатска листа – 303 за градоначалници и 558 за членови на советите.
Најголем интерес е забележан во Град Скопје, каде се поднесени 18 кандидатури за градоначалник и 20 листи за членови на Советот на Градот. Оваа бројка ја прави изборната трка за главниот град најконкурентна во земјата.
Конкуренција низ поголемите градови
Покрај Скопје, голем број кандидати се пријавени и во други поголеми градови. За Струга потврдени се 9 листи за градоначалници, за Битола 8 кандидати, додека за Охрид потврдени се 4 листи за градоначалници.
Во скопските општини, најмногу кандидати за градоначалници има во Шуто Оризари – осум. За Кисела Вода и Гази Баба ќе претендираат седум кандидати, за Аеродром шест, за Карпош пет, а за Центар четири кандидати. Во Чаир се пријавени тројца кандидати, а исто толку има и во Илинден.
Почеток на изборната трка
Државната изборна комисија официјално ја отвори изборната кампања, по што сите регистрирани политички субјекти добија зелено светло да промовираат својата понуда. Кампањата ќе трае до 48 часа пред денот на гласањето, кога започнува изборното мртвило.
Политичките партии подготвиле обемни програми фокусирани на локалните прашања – од комунална инфраструктура, преку јавен превоз и урбанизам, до социјални услуги и економски развој на општините.
Голем дел од кандидатите веќе се познати, а кампањата официјално започна 20 дена пред денот на гласање. Политичките партии застапени во македонското Собрание веќе ги објавија најголем дел од кандидатите, вклучувајќи и актуелни градоначалници, министри, поранешни пратеници и директори.
Очекувања и предизвици
Првиот круг на локалните избори ќе се одржи на 19 октомври 2025 година, а вториот круг две недели подоцна, на 2 ноември. Овогодинешните локални избори доаѓаат во време кога граѓаните очекуваат конкретни решенија за секојдневните проблеми. Квалитетот на локалната самоуправа, транспарентноста и ефикасноста на општинските служби се главните теми што ги истакнуваат избирачите.
Загадувањето на воздухот, автобускиот или јавниот превоз, зеленилото, убавите и прегледни улици, канализацијата, чистотата, состојбата во училиштата, градинките и урбанизацијата, би требало да бидат главните прашања на овие избори.
Државата за овие избори предвиде 9,7 милиони евра. Набљудувачите очекуваат дека кампањата ќе биде динамична, со акцент на директната комуникација со граѓаните преку митинзи, посети на населби и дебати. Социјалните мрежи, исто така, ќе играат значајна улога во допирањето до помладите избирачи.
Сите очи се насочени кон тоа како ќе се одвива изборниот процес и дали ќе се одржи високиот стандард на демократија и фер натпревар на осмите по ред локални избори во Северна Македонија.
