Меркел изјави дека нејзината политика за бегалци од 2015 година била еден фактор, но не и единствената причина, за подемот на крајнодесничарската Алтернатива за Германија

Поранешната германска канцеларка Ангела Меркел изјави дека нејзината политика за бегалци од 2015 година била еден фактор, но не и единствената причина, за подемот на крајнодесничарската Алтернатива за Германија (АфД).

Зборувајќи во интервју за Шпигел синоќа, Меркел истакна дека кога ја напуштила функцијата, АфД имала 11 до 12 отсто на анкетите, што укажува дека миграцијата играла улога во растот на партијата, но дека постојат и други причини. Таа не прецизираше кои би можеле да бидат тие причини.

Кога Меркел дозволи стотици илјади бегалци да влезат во Германија во 2015 година, антиимиграциската АфД не беше претставена во Бундестагот, долниот дом на парламентот. До федералните избори во 2021 година, партијата освои 10,3 проценти од гласовите. Денес, таа има помеѓу 24 и 27 проценти на анкетите и ги надмина конзервативците на канцеларот Фридрих Мерц како најсилна партија во некои анкети.

- Advertisement -

Меркел беше претпазлива во врска со повиците од социјалдемократите за забрана на АфД.

– Јас не сум адвокат и се фокусирам на прашањето што можам да направам во меѓусебните односи со демократите, во справувањето со проблемите што се јавуваат за да ги ограничам шансите на АфД – рече таа.

Меркел, исто така, ги пофали потезите на Мерц во надворешната политика за време на неговите први месеци на функцијата.

– Kако граѓанин, мислам дека она што Мерц го направи досега е добро. Утешно е што Германија повторно се ангажира со шарм и глас во Европа и во светот – рече таа.

Меркел, која порано ја водеше конзервативната партија Христијанско-демократска унија (ЦДУ), претходно го критикуваше Мерц за неговото справување со миграцијата и за тоа што неговиот конзервативен блок ја протурка резолуцијата за миграцијата во парламентот со гласовите на АфД.