Полска не е способна да „ги заштити луѓето“ во случај на „масовен руски воздушен напад“, неодамна изјави украинскиот претседател Володимир Зеленски откако 19 руски беспилотни летала влегоа во полскиот воздушен простор, а само четири беа соборени.
Во интервју за Скај њуз, Зеленски рече дека искуството од војувањето станало клучен фактор.
– Ако споредите дека ние уништивме 700 беспилотни летала од 810, а Полјаците 4 од 19, јасно е дека тие не можат да ги заштитат луѓето ако имаат масовен напад – истакна тој.
Навлегувањето на беспилотни летала на полска територија и ваквите коментари покренаа прашања за силата на полската армија.
Полска е една од најсилните воени сили во Европа и клучна членка на НАТО, особено поради нејзината позиција на источната граница на Алијансата и зголемената модернизација по руската инвазија на Украина во 2022 година.
Според индексот на Глобална огнена моќ (GFP) за 2025 година, Полска е рангирана на 21-то место од 145 земји во светот со вкупен индекс на моќ од 0,3776, при што понискиот резултат укажува на посилна војска.
Ова е подобрување во однос на претходните години (24-то место во 2011 година), што одразува брза модернизација.
Третата армија на НАТО
Во Европа, Полска има трета најголема армија (по Турција и Украина) и планира да достигне вкупно 300.000 војници до крајот на деценијата, со цел да стигне и до 500.000, вклучувајќи ги и резервистите.
Полска инвестира многу во одбраната, планирајќи 4,7 отсто од БДП-то (повеќе од 45 милијарди долари) до 2025 година, што е најголем удел во НАТО.
– Историјата нè научи дека мора да бидеме подготвени за сè – велат полските лидери, оправдувајќи ги ваквите инвестиции.
Вооружените сили на Република Полска се состојат од пет гранки: копнени сили, воздухопловни сили, морнарица, специјални сили и територијална одбрана.
Полска има над 200.000 активни војници, што ја прави трета најголема војска во НАТО по САД и Турција. Исто така, има околу 400.000 резервисти, односно до 500.000 доколку тука се вклучи и територијалната одбрана.
Во случај на продолжен конфликт, се проценува дека ќе може да мобилизира до 2,4 милиони луѓе со обука и опрема.
Во однос на оружјето и опремата, ситуацијата брзо се менува, многу е нарачано, но најзначајните бројки се околу 800 тенкови, вклучувајќи Леопард 2, ПТ-91 Тварди и М1 Абрамс.
Полјаците, исто така, имаат речиси 100 борбени авиони, вклучувајќи Ф-16 и МиГ-29, со планови за 32 Ф-35 до 2030 година. Тие имаат 100 хеликоптери, вклучувајќи и нарачка за 96 хеликоптери AH-64 Апачи.
Морнарицата има две фрегати, една корвета и нема подморници, што ја прави најмалку опремениот дел од војската.
Полскиот воен аналитичар Михаел Цулд предупредува: „Полска има импресивна армија, но нема залихи на муниција за долгорочен конфликт. Околу 50 проценти од нејзината опрема е сè уште од советско потекло, што ја отежнува интеграцијата со стандардите на НАТО“.
Две недели отпор
Шефот на Канцеларијата за национална безбедност на Полска, Дариуш Луковски, исто така, изјави ова лето дека полската војска има доволно залихи за да издржи непријателски напад две недели пред да пристигнат засилувањата на НАТО.
Аналитичарите велат дека полскиот пример покажува дека градењето моќна армија е долг и сложен процес. Не е доволно само да се купи најдоброто на пазарот.
Бен Хоџис, поранешниот командант на американските сили во Европа, во неодамнешно интервју за Defense News изјави: „Полска има импресивен број војници, но ѝ недостасува длабочина на обука за сложени операции. Тие треба да инвестираат во симулации и заеднички вежби на НАТО“.
Меѓутоа, американскиот воен аналитичар Мајкл Кофман вели дека главниот проблем е интеграцијата.
„Полска брзо ја заменува советската опрема со ХИМАРС и Ф-35, што ја прави способна за високотехнолошко војување. Сепак, интегрирањето на толку многу различни системи (американски, корејски) создава логистички кошмари“.
Во полското општество и политика нема поделба околу потребата земјата да биде воено што е можно посилна. Сега таа е и економски моќна сила, а нејзината геополитичка позиција и фактот дека се граничи со Украина, Белорусија и Русија преку енклавата во Калининград не остава простор за опуштање.
Главниот противник на Русија
Во последните две децении, Полска стана лидер во промовирањето на интересите на земјите од Источна Европа во рамките на ЕУ и НАТО, главен противник на Русија и сојузник на САД.
Логистичката и воената поддршка на украинската држава и хуманитарната помош за украинските бегалци од почетокот на руската агресија врз Украина во 2022 година ја зајакнаа позицијата на Полска во рамките на западниот блок.
Планот за воен развој до 2035 година беше подготвен со претпоставка дека дотогаш нема да има војна со Русија. Има два дела, програма за техничка модернизација и зголемување на бројот на активни војници на речиси половина милион.
Неодамна беше објавено дека Полска разгледува барање за француски нуклеарен штит бидејќи нема свој нуклеарен арсенал, што е клучна слабост во однос на Русија.
Полскиот премиер Доналд Туск силно ја поддржува забрзаната модернизација на армијата.
Во своето последно обраќање пред парламентот, тој рече дека Полска во моментов е најблиску до отворен конфликт од Втората светска војна. Меѓу другото, тој рече дека секој возрасен маж ќе мора да помине воена обука.
– Полска мора да се подготви за различни сценарија. Нашата војска мора да биде способна да одбие каква било закана – рече Туск.
