Илјадници жители на Берлин беа принудени да ги напуштат своите домови откако во четврток во реката Шпре беше пронајдена неексплодирана бомба од Втората светска војна, која се очекува да биде отстранета денес.
Полицијата постави 500-метарски безбедносен кордон во густо населена област на градот по откривањето на неексплодирана бомба од Втората светска војна, соопшти берлинската полиција на мрежата X.
Како дел од евакуацијата, полициски екипи ги посетија куќите и становите и ги предупредија жителите дека мора привремено да ја напуштат областа од безбедносни причини.
Полицијата соопшти дека бомбата ќе биде деактивирана денес, кога нуркачите ќе можат да извршат подетална проверка, објави Дојче Веле. Бомбата е четири метри под вода и е покриена со тиња и слуз, што ја отежнува операцијата, додадоа тие.
Се очекува жителите да можат да се вратат во своите домови денес.
Дотогаш, бродарството по реката Шпре, која тече низ градот, е запрено.
