Државниот секретар на САД, Марко Рубио, денес објави дека американскиот претседател Доналд Трамп би можел да се сретне со украинскиот претседател Володимир Зеленски следната недела. Според него, можноста за средба е значителна, бидејќи Трамп сè уште се надева дека би можел да игра улога во посредувањето за мировен договор меѓу Украина и Русија.
Како што објасни Рубио за време на посетата на Израел, Трамп имал неколку телефонски разговори со рускиот претседател Владимир Путин и неколку средби со Зеленски. Следната средба меѓу претседателите на САД и Украина веројатно ќе биде во Њујорк следната недела, каде што светските лидери ќе се соберат на Генералното собрание на Обединетите нации.
Трамп веќе ѝ се закани на Русија со повеќе санкции ако рускиот претседател Владимир Путин не постигне компромис. Но, досега не усвоил никакви санкции, иако Русија ги ескалира нападите врз Украина.
„Тој ќе продолжи да се обидува. Ако мирот е можен, тој сака да го оствари. Претседателот може во одреден момент да одлучи дека мирот не е можен. Тој сè уште не е таму, но може да стигне до таа точка“, рече Рубио, додавајќи дека Трамп е уникатен во смисла дека може да разговара со Путин, Зеленски и европските лидери.
„Ако се повлече од ова или ја санкционира Русија и каже „Готово е“, тогаш нема да остане никој во светот што би можел да посредува во разговорите за прекин на конфликтот“, рече Рубио, според француската новинска агенција АФП.
Во интервју за британската телевизиска станица Скај њуз денес, Зеленски го повика Трамп да заземе „јасен став“ за пакетот санкции против Русија и безбедносните гаранции за Украина. Тој рече дека Трамп мора да преземе „решителни чекори“ за „Путин да почне да се плаши од него“.Според украинскиот претседател, единствениот начин да се стави крај на борбите е прво да се воспостават одредени безбедносни гаранции. Ова може да се случи само ако Трамп е „храбар“. Зеленски се надева дека британскиот премиер Кир Стармер детално ќе му објасни на американскиот претседател за време на посетата на Трамп на Велика Британија оваа недела како да се обезбеди безбедна иднина за Украина.
„Верувам дека САД се доволно силни за сами да донесуваат одлуки. Верувам дека Трамп може да ни обезбеди системи за воздушна одбрана во доволни количини, САД имаат доволно од нив“, рече Зеленски во разговорите во претседателската палата во Киев.
„Убеден сум дека САД можат да воведат доволно санкции за да ѝ наштетат на руската економија. Покрај тоа, Трамп има доволно моќ да го натера Путин да се плаши од него. Европа веќе воведе 18 пакети санкции против Русија. Сега сè што недостасува е силен пакет од САД“, додаде украинскиот претседател.
