Русија им се закани на европските земји дека ќе преземе мерки „на сите можни начини“ ако се обидат да ги запленираат нејзините средства.
Русија ги предупреди европските земји дека ќе преземе мерки против секоја земја што ќе се обиде да ги заплени нејзините средства, објави Ројтерс.
„Ако се случи ова, Русија ќе ги прогонува земјите од ЕУ, како и европските дегенерици од Брисел и поединечните земји-членки што ќе се обидат да ги запленираат нашите средства – до крајот на векот“, напиша на Телеграм поранешниот руски претседател Дмитриј Медведев, кој моментално е потпретседател на Рускиот совет за безбедност.
Тој додаде дека Москва ќе преземе мерки „на сите можни начини“, од тужби во домашни и меѓународни судови до вонсудски мерки.
Кремљ инсистира дека секое запленување на руски средства би претставувало кражба што би ја поткопала довербата во европските и американските валути и обврзници.
Предупредувањето доаѓа по медиумските извештаи дека ЕУ размислува да користи неколку милијарди евра замрзнати руски средства за финансирање на украинската одбрана. По инвазијата во 2022 година, САД и нивните сојузници замрзнаа помеѓу 250 и 300 милијарди евра руски државни средства, главно во форма на европски, американски и британски државни обврзници, според Ројтерс.
Ројтерс објави дека претседателката на Европската комисија, Урсула фон дер Лајен, сака ЕУ да најде нов начин за финансирање на одбраната на Украина од Русија со користење на средства поврзани со замрзнати руски средства во Европа.
Според „Политико“, Европската комисија размислува да ги искористи руските депозити во готово во Европската централна банка, кои произлегуваат од доспеани обврзници во руска сопственост, за финансирање на таканаречен „компензациски заем“ за Украина.
„Украина ќе почне да го враќа заемот дури откако Русија ќе плати компензација. Но, овие пари ќе ѝ помогнат на Украина денес“, изјави фон дер Лајен пред Европскиот парламент, без да даде детали.
