Полскиот премиер Доналд Туск потврди дека Полска побарала активирање на Член 4 од Северноатлантскиот договор, по 19 руски упади со беспилотни летала во полскиот воздушен простор преку ноќ. Голем дел од нив, нагласи тој, влегле од правец на Белорусија.
Ги следиме сите најважни настани околу упадот на руски беспилотни летала на територијата на НАТО ТУКА.
„Фактот дека овие беспилотни летала, кои претставуваа безбедносна закана, беа соборени ја менува политичката ситуација. Затоа, сојузничките консултации беа во форма на официјално барање за активирање на Член 4 од НАТО“, рече Туск во своето обраќање пред парламентот.
Тој додаде дека ова е провокација „неспоредливо поопасна од која било претходна“ од полска гледна точка, но исто така нагласи дека „во моментов нема причина да се тврди дека сме во воена состојба“.
Според податоците што ги презентираше, потврдено е дека се соборени три дрона, додека се чека официјална потврда за уште едно. Полската операција за воздушна одбрана траеше цела ноќ – првиот напад беше регистриран во 22:06 часот, а последното нарушување на воздушниот простор во 6:30 часот наутро.
Особено загрижувачки, нагласи Туск, е тоа што за прв пат, дронови влегоа во Полска директно од Белорусија, а не само како резултат на дезориентација или помали провокации од украинската насока.
Што вели Член 4 од НАТО?
Член 4 од Северноатлантскиот договор предвидува дека членовите на Алијансата ќе се консултираат меѓусебно секогаш кога, според нив, е загрозен територијалниот интегритет, политичката независност или безбедноста на една од нив. Ова не е воена одредба како Член 5, туку механизам за политички консултации и заеднички одговор.
Како што рече Туск, „Член 4 е само почеток. За време на консултациите, очекуваме многу поголема поддршка од сојузниците. Ова е конфронтацијата што Русија ја најави на слободниот свет“.
Реакцијата на претседателот
Претседателот на Полска, Карол Навроцки, зборуваше на истата тема, нагласувајќи дека тоа е „невиден момент во историјата на НАТО, но и во модерната историја на Полска“.
По состанокот во Канцеларијата за национална безбедност, тој рече дека со премиерот и военото раководство разговарал за иницирањето на Член 4, како и за потребата од зајакнување на полската одбрана од беспилотни летала во рамките на НАТО.
