Нема повеќе ладно пиво во продавниците во Хрватска?

Хрватското Министерство за економија подготвува амандман на Законот за трговија што ќе им овозможи на градовите да ја забранат продажбата на ладно пиво во продавниците и киосците.

Хрватска би можела да воведе ограничувања за продажба на ладни алкохолни пијалоци во продавниците и киосците следната година, објавува Dnevnik.hr. Локалните власти би одлучиле за воведувањето на мерката, а би можеле да одлучат и во кои времиња ќе се применува забраната.

Угостителите ги поздравуваат најавените промени. Како што објасни заменик-градоначалникот на Макарска, Антонија Радиќ Бркан, таквата мерка би придонела за квалитетот на туристичката понуда и имиџот на градот.

- Advertisement -

Градоначалникот на Сплит, Томислав Шута, од партијата ХДЗ, смета дека ова нема да биде доволно во борбата против неконтролираниот туризам. „Во самиот центар на градот, мислам дека е соодветно градскиот совет да одлучува за работното време и продажбата на алкохолни пијалоци. Мислам дека тоа е проблем што е присутен и што треба да го решиме. Би сакал министерот да дојде и самиот да види како изгледа сето тоа. Не сум го видел да го отфрли нашиот предлог. Но, гледам дека дискусијата се одвива, што е за пофалба“, рече Шута.

На предлогот, кој наскоро ќе биде ставен на јавна дебата, се спротивставуваат сопствениците на продавници и киосци. Тие се убедени дека многумина би морале да ги затворат своите врати поради забраната. Наместо тоа, тие предлагаат построг надзор и казни за оние што го нарушуваат јавниот ред и мир.