Спасот од стресот е во цуцлата

Притисок на работа, кредити за стан или за автомобил, меѓучовечките односи, или воопшто – модерниот начин на живот, сѐ тоа може да предизвикува анксиозност. Но, се чини, решението е во – цуцла. Тоа е новиот хит во Кина, бидејќи продажбата на цуцли за возрасни е, според многумина, во неверојатен пораст.

На страниците за е-трговија низ цела Кина, цуцлите се рекламираат како средство за ублажување на стресот или помагало за спиење. Па за многумина преоптоварени со секојдневниот живот, ова е доволно за да кликнат „Купи сега“. Најуспешните продавници веќе продаваат и по неколку илјади парчиња месечно.

Психолозите го објаснуваат овој феномен преку концептот на регресија – кога се соочуваат со екстремен стрес и проблеми што не можат веднаш да ги решат, за луѓето е очекувано да се враќаат во некоја порана своја фаза од развојот. А цуцлата, велат тие, ја симболизира безбедноста и удобноста на детството.

- Advertisement -

Но, дали навистина функционира? Како што објавува порталот „Одити сентрал“ (Oddity Central), многу луѓе на интернет тврдат дека се чувствуваат помалку стресно кога имаат цуцла во устата додека работат, се чувствуваат помирно, но и дека спијат подобро – „како бебе“.

Сепак, стручњаците предупредуваат и на опасности. Д-р Танг Цаомин од Универзитетот Сечуан предупредува дека оралната структура кај возрасните е сосема различна од онаа на бебето, а продолжената употреба на цуцла може да предизвика нарушувања на зглобовите, болка, кликање, па дури и тешкотии при отворањето на устата. Тој, исто така, додава дека материјалот и дизајнот на овие цуцли можеби не се прилагодени на устата на возрасните, а особено предупредува да не се спие со цуцла во устата, бидејќи тоа може да го отежни дишењето, па дури и да предизвика задушување.