Во првата половина од 2025 година, бројот на туристи во Грција бележи минимален раст од 0,6%, меѓутоа приходите од туризмот се за 11% повисоки споредбено со истиот период лани

Во првата половина од 2025 година, бројот на туристи во Грција бележи минимален раст од 0,6%, меѓутоа приходите од туризмот се за 11% повисоки споредбено со истиот период лани, покажуваат податоците од Банката на Грција, јави дописничката на МИА од Атина.

Во периодот јануари – јуни 2025 година, Грција ја посетиле речиси 11,7 милиони туристи, а приходите достигнале до 7,66 милијарди евра.

Поконкретно, како што соопштија од Банката на Грција, порастот се должи како на зголемените приходи од жители на земјите од ЕУ за 8,5 %, на 4 милијарди евра, така и на зголемувањето на приходите од жители на останатите земји за 13,7% кои изнесуваат 3,2 милијарди евра.

- Advertisement -

Во однос на бројот на туристи, се зголемил за само 0,6% споредбено со лани, а земјата ја посетиле 11,69 милиони туристи.

Туристичкиот сообраќај преку аеродромите бележи раст од 4,9%, додека преку копнените гранични премини е забележан пад од 13,1%.

Од земјите-членки на ЕУ, Грција ја посетиле 6,4 милиони туристи (намалување од 6,3% во споредба со истиот период лани), додека од останатите земји има зголемување за 10,5 % достигнувајќи до 5.3 милиони патници.

Во однос на податоците за јуни 2025 година, и покрај тоа што бројот на туристи во Грција се намалил за 1,7% во споредба со истиот месец лани, приходите се зголемени за 8,8 %.

Во конкретниот месец, драстично се намалени пристигнувањата преку копнените гранични премини (за 19,7%).

Минатата година беше рекордна за туризмот во Грција со речиси 36 милиони туристи и приходи од 21,7 милијарди евра.