Лавров тврди дека Русија само го штити рускиот народ во Украина

Рускиот министер за надворешни работи Сергеј Лавров изјави дека Русија никогаш немала намера да окупира украински територии, туку само сакала да го заштити рускиот народ.

– Сакам уште еднаш да нагласам дека никогаш не сме рекле дека треба само да окупираме некои територии. Ниту Крим, ниту Донбас, ниту Новорусија (така Русите историски ги нарекувале делови од денешните региони Одеса, Херсон, Николаев, Днепропетровск, Запорожје, Луганск и Донецк, а понекогаш и Крим) како територии никогаш не биле наша цел – рече Лавров во интервју за руската државна телевизија.

Лавров тврди дека Москва „секогаш сакала да го заштити рускиот народ кој живеел на споменатите територии стотици години“. Тој исто така рече дека за време на претседателствувањето на Володимир Зеленски, Украина „донела закони чија цел била да ги уништи правата на говорниците на рускиот јазик“.

- Advertisement -

Изјавата на Лавров доаѓа во време на интензивирани дипломатски активности. На 15 август се одржаа разговори меѓу американскиот претседател Доналд Трамп и рускиот лидер Владимир Путин. По средбата со украинскиот претседател Володимир Зеленски и европските лидери во Вашингтон на 18 август, Трамп изрази надеж за што поскоро организирање на американско-украинско-руски разговори.

Зеленски потврди дека се во тек подготовките за средбата со Путин, по што би можел да следи трилатерален состанок со Трамп.

Во 2014 година, Русија го нападна и го окупираше украинскиот полуостров Крим и дел од Донбас. Во февруари 2022 година, таа започна инвазија на Украина, напаѓајќи цивилни населби низ целата земја со ракети и бомби.