Македонските ѕвезди се простуваат од Петар Исиров Пјотр

На социјалните мрежи осамна веста за заминувањето на уште еден македонски рок музичар и пејач, Петар Исиров Пјотр. Сите го познаваа под прекарот Перо Кокер, зашто славниот Џо Кокер беше неговиот идол, а неговата музика беше постојано дел од неговите настапи.

Пјотр настапуваше повеќе од три децении по ноќните клубови и кафулињата со различни музичари, а имаше издадено и неколку авторски песни.

Минатата година (2024) во рамките на одбележувањето на 5 години од постоењето на „Котон блуз фестивал“ во скопскиот клуб „Маракана“, Пјотр и деветчлениот бенд на бината составен од искусни музичари, ја славеше музиката на Џо Кокер. Оние кои биле велеа дека лесно можел да помине како концерт на вистинскиот Кокер.

- Advertisement -

Утринава (08.08.2025), по веста за неговата смрт, познатите македонски музичари и пејачи се простуваат на социјалните мрежи со својот колега, другар и пријател Пјотр.

– Пјотр Исиров – бунтовник , хипик , рокер , „Кокер“ , Џокер , ноќна птица, и ловец и плен – во блузот на градот заглавен, тлее и живее за секоја секунда да пее, за сите другар – за себе си без никаков ќар …. Почивај во мир друже , светол ти патот кон небото..
Сочувство до Нина и Павел!“ – сподели Петар Ренџов на својот профил на Фејсбук.

Од него се простија и македонските пејачки Елена Петреска и Биба Додева, Вера Јанковиќ и многу други, сите со своите мисли и спомени за Пјотр.

– Беше голема чест и привилегија да те имам за другар, пријател, колега… Колку свирки, дружби во последните 30-ина години.Секогаш позитивен и насмеан. Нека ти е лесна земја скопска, легендо. Почивај во мир Перо Кокер… Срце ми се кине – споделил музичарот, пејач и магионичар Георги Гавровски познат како Гого Реквием, инаку близок пријател на Петар Исиров.