Голем пожар избувна утринава кај складиште за нафта во близина на рускиот град Сочи по дронски напад од Украина

Голем пожар избувна утринава кај складиште за нафта во близина на рускиот град Сочи по дронски напад од Украина. Локалните власти го потврдија инцидентот, при што гувернерот на Краснодарскиот крај, Венијамин Кондратјев, изјави дека 127 пожарникари се вклучени во гаснењето на огнот. Аеродромот во Сочи привремено ги суспендираше сите летови, објави Би-би-си.

Русија тврди дека ова е еден од неколкуте украински дронски напади изведени викендов врз цели во внатрешноста на земјата, меѓу кои и во градовите Рјазан, Пенза и Воронеж. Гувернерот на Воронеж соопшти дека четири лица се повредени при еден од нападите.

Руското Министерство за одбрана соопшти дека ноќта меѓу саботата и неделата биле пресретнати 93 украински дронови, од кои 60 над Црното Море.

- Advertisement -

Во меѓувреме, украински официјални лица соопштија дека руска ракета го погодила градот Миколаив, уништувајќи домови и цивилна инфраструктура. Најмалку седум цивили се повредени, од кои тројца се хоспитализирани, според украинската Државна служба за итни ситуации.

Украинските воздушни сили тврдат дека Русија ноќеска испалила 83 беспилотни летала или, според друг извештај, 76 дронови и 7 ракети, при што 61 од нив биле соборени. Нападите погодиле осум различни локации во земјата.

Овие напади следуваат по една од најсмртоносните недели за украинските цивили, вклучително и нападот врз Киев во четврток, кога загинаа најмалку 31 лице. Украинските власти изјавија дека во нападот биле користени повеќе од 300 дронови и осум крстосувачки ракети.

Украинскиот претседател Володимир Зеленски повторно побара засилени меѓународни санкции против Русија, додека американски претседател Доналд Трамп ги осуди руските напади и најави нов бран санкции.

Трамп, кој во јули постави 50-дневен рок до Владимир Путин за да го прекине војниот конфликт, сега постави нов рок од „10 до 12 дена“, кој, според неговата последна изјава, истекува на 8 август.