Паника во западниот дел на Грција, пожар се движи кон планината Вунаса, а 55 деца вчера мораа итно да бидат евакуирани од летен камп. Властите преземаа мерки на претпазливост откако силниот оган почна да се шири во правец од Дескати кон Гревена, објави државната телевизија ЕРТ, а веста ја пренесе и „Protothema.gr“.
Градоначалникот на Дескати, Димитрис Котас, потврди дека децата се префрлени на безбедно, нагласувајќи дека евакуацијата е превентивна. Тој ја опиша ситуацијата како тешка, бидејќи пожарот се шири и е надвор од контрола. Сепак, изрази оптимизам дека огнената стихија ќе биде ставена под контрола наскоро.
На теренот се ангажирани 45 пожарникари со 11 возила, како и три планински единици од 8-та специјализирана единица за итни случаи (Е.М.О.Д.Е.). Помош од воздух пристигнал преку два хеликоптери, додека локалните власти и доброволци со цистерни за вода активно биле вклучени во гаснењето.
Засега не постои директна закана по населени места, но локалните жители се предупредени да бидат подготвени во случај на нова евакуација. Областа каде што се развива пожарот се наоѓа западно од градот Катерини, и има густ шумски појас, што ја отежнува интервенцијата.
