Гутереш: Гладот никогаш не смее да се користи како оружје во војната

Гладот никогаш не смее да се користи „како оружје на војна“, изјави денес генералниот секретар на ОН, Антонио Гутереш, осврнувајќи се конкретно на тековните конфликти во Појасот Газа и Судан.

„Конфликтите продолжуваат да шират глад во Појасот Газа, Судан и пошироко. Гладот ја поттикнува нестабилноста и го поткопува мирот“, рече Гутереш за време на видеоконференција на Самитот на ОН за прехранбени системи во Етиопија.

Тој додаде дека светот „никогаш не смее да го прифати гладот како оружје на војна“.

- Advertisement -

Светската здравствена организација (СЗО) предупреди во неделата дека стапките на неухранетост во Појасот Газа достигнуваат алармантни нивоа, со висока стапка на смртност во јули.

Од 74 смртни случаи поврзани со неухранетост регистрирани од почетокот на годината, 63 се случиле во јули, вклучувајќи 24 деца под пет години, едно дете над пет години и 38 возрасни, соопшти агенцијата на ОН.

Израел, кој го држи Појасот Газа под опсада од почетокот на војната против Хамас на 7 октомври 2023 година, воведе строга блокада на територијата на почетокот на март, која беше само делумно ублажена кон крајот на мај, што доведе до сериозен недостиг на храна.

Од април 2023 година, во Судан беснее војна меѓу армијата предводена од генералот Абдел Фатах ал-Бурхан, де факто владетел на земјата од пучот во 2021 година, и паравоените Сили за брза поддршка (RSF) предводени од неговиот поранешен заменик, генералот Мохамед Хамдан Дагло.

ООН процени дека војната предизвика една од најлошите хуманитарни кризи во светот.