Хуманитарната катастрофа во Појасот Газа мора веднаш да престане, повикаа денеска во заедничко соопштение Париз, Лондон и Берлин

Хуманитарната катастрофа во Појасот Газа мора веднаш да престане, повикаа денеска во заедничко соопштение Париз, Лондон и Берлин.

„Хуманитарната катастрофа на која сме сведоци во Газа мора веднаш да престане“, нагласија трите европски земји.

Тие на овој начин одговорија на алармот објавен од Обединетите Нации и од невладините организации дека постои ризик од непосреден и широко распространет глад во Газа. Трите европски престолнини ја повикуваат европската влада веднаш да ги укине ограничувањата за испорака на помош.

- Advertisement -

Франција, Велика Британија и Германија, исто така, потсетуваат дека Израел мора да ги почитува своите обврски според меѓународното хуманитарно право.

„Дојде моментот да се стави крај на војната во Газа“, додадоа тие и ги повикаа сите страни да го прекинат конфликтот со склучување на договор за моментален прекин на огнот.

Трите европски земји, исто така, го повторија својот повик за ослободување на израелските заложници во Газа и за разоружување на Хамас. Тие додадоа дека цврсто се спротивставуваат на секој обид за наметнување на израелски суверенитет над окупираните палестински територии.

„Заканите за анексија, изградбата на израелски населби и актите на насилство извршени од израелските доселеници против Палестинците ги компромитираат изгледите за договорено решение, кое предвидува коегзистенција со две држави“, предупредија Франција, Германија и Велика Британија.