Пропадна обидот за недоверба, 360 пратеници беа против смената

Европскиот парламент денеска ја одби иницијативата за изгласување недоверба на Европската комисија предводена од Урсула фон дер Лајен. Обидот, инициран од романскиот европратеник Георге Пипереа, пропадна со јасно мнозинство: 175 европратеници гласаа „за“, 360 беа „против“, а 18 се воздржаа.

Иницијативата беше поднесена со образложение дека Фон дер Лајен и нејзината Комисија „узурпирале овластувања“, ја загрозиле транспарентноста и го игнорирале Европскиот парламент во важни процеси на одлучување. За да помине, предлогот требаше да добие поддршка од најмалку две третини од пратениците што учествуваа во гласањето, и тоа бројно да надминува половина од вкупниот состав на Парламентот – услов што не беше исполнет.

На дебатата која се одржа во понеделникот, Пипереа жестоко ја нападна Фон дер Лајен:

- Advertisement -

„Во последните шест години, Комисијата на злоупотребувачки начин им ги одзеде овластувањата на земјите членки и го игнорираше Европарламентот. Недемократската концентрација на моќ во нејзини раце е спротивна на принципите на контрола и рамнотежа.“

Тој ја обвини и за зголемена сиромаштија, фрагментација на пазарот, ризици по државниот суверенитет и регрес во образованието.

Во своето обраќање, фон дер Лајен ги отфрли обвинувањата како политички мотивирани и ги обвини поддржувачите на иницијативата за „внесување раздор“ во институциите:

„Влеговме во ера на борба меѓу демократијата и нелиберализмот. Алармантна е заканата од екстремистички партии кои со дезинформации ги поларизираат општествата. Ова се движења поттикнати од заговори – од антиваксери до апологети на Путин.“

Фон дер Лајен не присуствуваше на денешното гласање – заминала уште синоќа за Рим, каде учествува на Конференција за поддршка на Украина. Според европски извори, пред заминувањето успеала да постигне важен договор со лидерите на Социјалистите и Демократите (СД), осигурувајќи 150 милијарди евра во наредниот буџет на ЕУ за работничко усовршување и социјална инклузија.

Овој договор беше клучен за да се избегне воздржаност од гласање од страна на социјалдемократите, што иако не би ја урнало Комисијата, ќе ја ослабеше нејзината политичка позиција и би испратило силна порака за недоверба.