Инспекторатот стопираше изградба во Охрид, следуваат кривични пријави

Државниот инспекторат за градежништво и урбанизам донесе решение за стопирање на изградбата на објект во заштитената зона на Старото градско јадро во Охрид, откако при вонредна контрола било утврдено дека инвеститорот градел без одобрение за градба.

Како што информираат од Инспекторатот, станува збор за објект што се гради во Старата охридска чаршија, во строго заштитена зона која е дел од светското наследство на УНЕСКО.

– Со решение број ИП 1бр 74-137 од вонреден инспекциски надзор, издадено од страна на Државниот инспекторат, изградбата е стопирана, а објектот затворен за понатамошни градежни активности – велат од Инспекторатот.

- Advertisement -

Поради непочитување на одредбите од Законот за градење, против инвеститорот ќе бидат поднесени соодветни пријави, а засилените контроли на инспекциските служби ќе продолжат и во наредниот период низ целата држава.

Од Инспекторатот нагласуваат дека заштитата на Старото градско јадро на Охрид е од суштинско значење за да се спречат дејства и појави што можат да доведат до уништување или деградација на ова културно-историско подрачје, кое уште од 1980 година е впишано на Листата на светско наследство на УНЕСКО.