Пентагон: Гренланд сега е под команда на американската војска во Северна Америка

Пентагон ја префрли територијата на Гренланд од јурисдикција на Европската команда во јурисдикција на Северноамериканската команда на американската армија. Овој потег следи по постојано изразената желба на американскиот претседател да ја анектира данската автономна арктичка територија.

Откако ја презеде функцијата во јануари, американскиот претседател Доналд Трамп постојано се закануваше дека ќе го анектира Гренланд во име на националната безбедност, што очекувано беше одбиено и од Гренланд и од Данска.

Пентагон во вторник ја префрли територијата на Гренланд од јурисдикција на Европската команда во јурисдикција на Северноамериканската команда на американската армија. Според соопштението, промената на јурисдикцијата на командите ќе ја зајакне способноста на американската војска да ги брани САД, ќе придонесе за посилна одбрана на Западната хемисфера и ќе ги продлабочи односите со арктичките сојузници и партнери.

- Advertisement -

Северноамериканската команда на САД ги опфаќа териториите на САД, Канада, Мексико и Бахамите. Како таква, таа би била одговорна за одбрана на Соединетите Американски Држави во случај на напад врз неа од странска инвазија.

Гренланд, дел од Данска, е дел од Европската команда, која се протега сè до далечниот исток на Русија. Американската војска има воена база на север од оваа арктичка територија уште од Втората светска војна.