Владата обезбеди 50 милиони денари за 1.570 стипендии за новите ученици во дуално образование од септември

Владата обезбеди 50 милиони денари за 1.570 стипендии за новите ученици во дуално образование од септември, соопшти владината прес служба.

Како што е соопштено, секој ученик запишан во дуалните паралелки кој ќе ги исполни условите ќе добива по 3.500 денари во текот на учебната година (9 месеци).

Стипендиите ќе се доделат за учениците за учебната 2025/2026 година.

- Advertisement -

-Реалниот сектор има потреба од стручни, квалификувани лица и за таа цел, како Влада преку овие мерки и чекори ги стимулираме младите своето образование да го продолжат во некоја од дуалните паралелки. Дополнително, потврда за тоа дека со оваа мерка како Влада ја развиваме соработката со реалниот сектор е вклучување на 550 компании кои директно ќе ја спроведуваат практичната обука на учениците што ќе се запишат во дуалните паралелки – велат од владата.

Како Влада, додаваат оттаму, правиме конкретни чекори за унапредување на образованието и создаваме кадри кои ќе добијат можност, доколку не го продолжат својот образовен процес на повисоко ниво, по завршување на средното училиште да се вработат во некои од компаниите.

-Преку ова ја намалуваме невработеноста, но и ги стимулираме младите да ги усовршат практичните вештини со кои ќе бидат поконкурентни на пазарот на труд. Образованието е најважниот столб на развојот на Македонија. Преку квалитетно и реформирано образование, младите ќе останат да ја градат сопствената иднина во Македонија – наведуваат од владата.