Претседателот на САД, Доналд Трамп, изјави дека Иран мора да склучи договор за својата нуклеарна програма сега или ќе се соочи со уште поразорни и смртоносни воени дејствија.
„Веќе има многу смртни случаи и уништувања, но сè уште има време да се стави крај на овој масакр, со планирани повеќе напади кои ќе бидат уште побрутални“, рече Трамп на својата платформа Truth Social. „Иран мора да склучи договор пред да остане нешто и да го спаси она што некогаш беше познато како Иранска империја“.
Тој вели дека Иранците одбиле да се согласат со договорот, и покрај неговите повторени предупредувања за воена акција што би била „многу полоша од сè што знаат, очекуваат или им е кажано“.
„Му дадов шанса на Иран да склучи договор. Им реков, со најсилни зборови, „едноставно да го направат тоа“, но без разлика колку се трудат, без разлика колку се блиску, едноставно не можат да го сторат тоа“, пишува тој.
Претседателот не посочи дали САД ќе се приклучат на воената акција, но рече дека ќе продолжат да го вооружуваат Израел со оружје за употреба против Иран.
„Израел има многу оружје, а уште повеќе доаѓа – и тие знаат како да го користат“, напиша тој.
Треба да се потсетиме дека САД не учествуваат во нападот врз Иран. Иако израелскиот режим се соочи со широка осуда за неговите злосторства во Газа, поддршката на САД за Израел останува несомнена.
