Почнува уписот на средношколците

Почнува уписот на средношколците, информира Министерството за образование и наука. Од утре, 14 јуни, до 17 јуни на полноќ е рокот за првото електронско пријавување во јунскиот рок за запишување ученици во прва година во јавните средни училишта за учебната 2025/2026 година.

Пријавувањето на учениците е со електронско аплицирање, преку линк до системот за електронски услуги на МОН https://e-uslugi.mon.gov.mk/ со посебна најава за средношколци преку сопствените кориснички сметки на schools.mk.

Откако ќе заврши електронското пријавување, ученците на 18 јуни (од 8 до 19 часот) и на 19 јуни (од 8 до 17 часот) треба да ја достават потребната документација до училиштата.

- Advertisement -

Конечната ранг-листа со резултатите од запишувањето и слободните места секое училиште ќе ја објави на 20 јуни 2025 година, најдоцна до 12 часот, на јавно место во училиштето и/или на училишната интернет-страница. Во училиштата каде што ќе има квалификациско тестирање, тоа ќе се организира на 23 јуни 2025 година, кога ќе бидат објавени и резултатите.

Второто електронско пријавување на учениците за упис во средните училишта во јунскиот рок ќе биде на 30 јуни 2025 година од полноќ до 23:59 часот, а потребната документација до училиштата ќе се доставува на 1 јули од 10 до 19 часот. Следниот ден (2 јули) ќе биде објавена и конечната ранг-листа со резултатите од запишувањето и слободните места. Во второто пријавување во јуни квалификациско тестирање ќе се организира на 4 јули 2025.

Пријавувањето во августовскиот уписен рок ќе се врши на 21 август 2025 година од полноќ до 15 часот електронски, кога ќе биде и доставувањето на документација до училиштата, Наредниот ден (22 август 2025) училиштата ќе објават конечна ранг-листа со резултатите од запишувањето.

Во Конкурсот на Министерството за образование и наука се наведени потребните документи за запишување во јавните средни училишта, како и насоките за неговото спроведување.