Среде семејните тензии, синот на Викторија и Дејвид Бекам, Бруклин Бекам, привлече внимание објавувајќи емотивен момент на социјалните мрежи.
На својот инстаграм-профил, Бруклин сподели фотографија од новата тетоважа, инспирирана од пораката што неговата сопруга Никола Пелц (30) му ја напишала непосредно пред нивната свадба во април 2022 година. Калиграфски напишана, тетоважата носи лична и емотивна порака за поддршка и љубов што му ја упатила Никола.
„Мое момче. Прочитај го ова секогаш кога ќе се чувствуваш вознемирено. Сакам да знаеш колку си сакан. Имаш најубаво срце што некогаш сум запознала и се надевам дека никогаш нема да поминам ден без твојата љубов. Мислам дека си неверојатен. Само знај дека можеме да поминеме низ сè заедно ако дишеш полека и веруваш. Те сакам повеќе од сè. Засекогаш твојата идна сопруга“, се вели во пораката.
Објавата следуваше во времето на повторното ширење на гласините за несогласувањата во семејството Бекам, особено оние поврзани со свадбата на Бруклин и Никола. Според извор близок до семејството Пелц, тензиите се појавиле кога Викторија Бекам наводно го извела првиот танц на свадбата, иако младенците планирале да танцуваат на избрана песна. Марк Ентони, долгогодишен пријател на семејството Бекам, требало да ја изведе песната како подарок, но непосредно пред тоа, тој ја повикал Викторија на сцената и ја најавил како „најубавата жена во просторијата“, што, според истите извори, ја повредило Никола.
Друг извор наведува дека Бруклин и Никола го имале својот прв танц порано вечерта, по што сите заедно уживале во настапот на Марк Ентони. Сепак, се вели дека тензиите во семејството сè уште траат, што дополнително било забележано кога Бруклин и Никола не присуствувале на прославата на 50-тиот роденден на Дејвид Бекам на 3 мај.
