Американски судија Луис Леман вчера ја отфрли тужбата за клевета од 400 милиони долари на актерот Џастин Балдони против актерката Блејк Лајвли, која го обвини Балдони дека сексуално ја вознемирувал додека го снимал филмот од 2024 година „С­è завршува со нас“

Американски судија Луис Леман вчера ја отфрли тужбата за клевета од 400 милиони долари на актерот Џастин Балдони против актерката Блејк Лајвли, која го обвини Балдони дека сексуално ја вознемирувал додека го снимал филмот од 2024 година „С­è завршува со нас“ (It Ends With Us), објави Ројтерс.

Балдони и Лајвли, кои глумеа заедно во филмот, со месеци се во правна битка, а судењето беше закажано за следната година.

Балдони ги обвини Лајвли, нејзиниот сопруг Рајан Рејнолдс, нивниот публицист, „Њујорк тајмс“ и други за организирање кампања за клевета поради изнуда. Балдони ја поднесе тужбата откако Лајвли поднесе тужба против него минатата година, обвинувајќи го за сексуално вознемирување и водење кампања за оцрнување на нејзиното име.

- Advertisement -

Тој ја обвини Лајвли дека се обидела да го „киднапира“ филмот, чии теми вклучувале семејно насилство, а потоа го обвини него кога нејзиниот „катастрофален“ промотивен пристап предизвика онлајн реакција против неа.

Претставниците на Блејк Лајвли се огласија за американските медиуми и открија бројни детали.

– Денешната пресуда е целосна победа и целосна рехабилитација за Блејк Лајвли, како и за сите што беа вовлечени во оваа одмаздољубива тужба од Џастин Балдони и партиите „Вејфарер“, вклучувајќи ги Рајан Рејнолдс, Лесли Слоун и „Њујорк тајмс“ – рекоа тие, додавајќи:

– Како што тврдевме од самиот почеток, оваа „тужба од 400 милиони долари“ беше фарса, а судот јасно го препозна тоа. Со нетрпение го очекуваме следниот чекор, каде што ќе бараме адвокатски трошоци, тројна отштета и казнена отштета против Балдони, Саровиц, Нејтан и другите во групата „Вејфарер“ кои ја извршија оваа злоупотреба на правниот систем – изјави портпаролот Блејк Лајвли за „Дејли мејл“.

„Сè завршува со нас“ доби мешани критики, најмногу поради непријатностите што се случуваа помеѓу двајцата главни актери Бладони и Лајвли, но заработи повеќе од 351 милион долари низ целиот свет, според Box Office Mojo, кој објавува податоци за заработката на филмовите во киносалите.