Група активисти, меѓу кои и шведската климатска активистка Грета Тунберг, ќе бидат депортирани од Израел откако беа уапсени на хуманитарен брод кој се обидуваше да стигне до Газа, објавија израелските власти.
Едрилицата „Мадлин“, која превезуваше 12 лица и симболична хуманитарна помош за жителите на Газа, беше пресретната од израелските сили во раните утрински часови во понеделник и одвлечена до пристаништето Ашдод.
Израел го опиша обидот како „мисија за селфи“, а патниците беа префрлени на аеродромот „Бен Гурион“ за депортација.
„Лицата кои одбиваат да потпишат документи за депортација и да го напуштат Израел ќе бидат изведени пред судските органи“, соопшти израелското Министерство за надворешни работи за мрежата Икс.
Активистите од Коалицијата „Флотила на слободата“ (FFC), која ја организираше флотилата, потврдија дека сите учесници сега се под надзор на израелските власти.
„Тие може да бидат испратени на лет од Тел Авив уште вечерва“, објавија организаторите на социјалните мрежи.
