За една година изгубени 100.000 работни места

Економската криза во Германија сериозно го погоди индустрискиот сектор – само во изминатата година се изгубени повеќе од 100.000 работни места, според анализата на реномираната ревизорска и консултантска фирма EY (Ernst & Young).

Автомобилската индустрија е најтешко погодена – околу 45.400 работници се отпуштени, додека вкупниот број на вработени во индустријата се намали на 5,46 милиони до крајот на првиот квартал, што е за 1,8% помалку во споредба со истиот период минатата година.

Во споредба со 2019 година, пред пандемијата, бројот на вработени во германската индустрија се намали за 217.000, или 3,8%, откако достигна рекорд во 2018 година со околу 5,7 милиони вработени.

- Advertisement -

Управниот директор на Ernst & Young, Јан Брорхилкер, предупреди дека индустриските компании се под огромен притисок.

– Агресивните конкуренти, особено од Кина, ги намалуваат цените, клучните продажни пазари слабеат, побарувачката во Европа стагнира на ниско ниво и постои значителна неизвесност околу американскиот пазар – рече Брорхилкер.

Во исто време, компаниите се борат со високи трошоци – на пример за енергија и персонал.

Отпуштањата, според прогнозите на Ernst & Young, нема да престанат наскоро. Се проценува дека најмалку 70.000 дополнителни работни места би можеле да бидат изгубени до крајот на 2025 година во индустријата, особено во производството на машини и автомобили, каде што програмите за намалување на трошоците веќе се во тек.

– Германскиот индустриски сектор честопати беше прогласуван за мртов, но постојано се покажуваше како исклучително отпорен благодарение на своите силни темели – рече менаџерот на EY, Брорхилкер.

Според него  условите мора да се подобрат

– Покрај пониските трошоци и помалата бирократија, треба да се зајакне домашната побарувачка за економијата да стане помалку зависна од извозот. Инвестициски пакет од повеќе милијарди долари од федералната влада би можел да даде одреден поттик – рече Брорхилкер.

Германското здружение на автомобилската индустрија (VDA) исто така верува дека владата носи дел од одговорноста.

– Притисокот за дејствување е голем бидејќи конкурентноста на Германија како деловна локација се намали во последните години. Затоа конкурентноста и привлечноста на Германија како локација мора да бидат водечки принципи на новата федерална влада – вели претседателката на VDA, Хилдегард Милер.