Државниот јавен обвинител Љубомир Коцевски изјави дека истрагата за пожарот во дискотеката „Пулс“ во Кочани е завршена и дека од денеска почнува увидот на одбраната во доказите

Државниот јавен обвинител Љубомир Коцевски синоќа изјави дека истрагата за пожарот во дискотеката „Пулс“ во Кочани е завршена и дека од денеска (петок, 30 мај) почнува увидот на одбраната во доказите.

– По два и пол месеца истрагата се завршува утре што значи дека од утрешниот ден се почнува со увид во предметот од страна на одбраната. Одбраната во наредните 15 дена има право да доставува докази кои јавното обвинителство ќе ги цени со тоа што по поминувањето на тие 15 дена ќе се донесе јавно-обвинителска одлука – рече Коцевски за Tелевизија 24.

Тој посочува дека досега ваков предмет немало во државата и дека се работи за сложена истрага со многу преземени дејствија и дека биле вклучени 13 јавни обвинители.

- Advertisement -

– Во рекордно време се обезбедија сите релевантни докази кои беа битни за истрагата – рече Коцевски.

Тој посочи дека продолжува истрагата околу улогата на полицајците кои таа ноќ биле во дискотеката и не исклучува можност доколку се обезбедат докази, истрагата да се прошири.

Во пожарот во дискотеката „Пулс“ на 16 март загинаа 63 лица, а околу 200 беа повредени.