Според информациите објавени од угледниот новинар Мигел Анхел Дијаз од радио станицата Копе, Реал Мадрид одлучил да не го обнови договорот со Лука Модриќ. Одлуката доаѓа директно од клубот, а не од идниот тренер Чаби Алонсо, кој ќе го наследи Карло Анчелоти. Доколку ништо не се промени, Модриќ би можел да се збогува со дресот на кралскиот клуб оваа сабота на стадионот „Сантијаго Бернабеу“, во натпреварот против Реал Сосиедад, со кој се затвора сезоната во Ла Лига.
Модриќ се надеваше дека ќе остане во клубот до својот 40-ти роденден, но се чини дека Реал има други планови. Клубот нема официјално да го објави неговото заминување во наредните денови – фокусот ќе биде исклучиво на заминувањето на Анчелоти. Модриќ би можел лично да го објави збогувањето, додека според информациите на новинарот Дијаз, церемонијата на збогување е планирана за сабота.
Во претходните сезони, Реал му нудеше едногодишни договори, обично кон крајот на сезоната, додека неговата плата постепено се намалуваше. Од 12,1 милиони евра во сезоната 2019/20, падна на 10,5 милиони во сезоната 2023/24. Минатото лето, тој се согласи на дополнително намалување – половина од неговата плата во споредба со претходната сезона, сакајќи да остане дел од тимот.
И покрај годините, Модриќ е сè уште физички многу во добра форма. Оваа сезона тој одигра 55 натпревари, а за разлика од многу негови соиграчи, не беше засегнат од некои поголеми повреди. Сепак, неговата улога во тимот беше променета – само 26 пати беше стартер, додека 29 пати влезе од клупата. Неговата незаменливост повеќе не беше доведена во прашање, а тоа најдобро се виде во клучните натпревари на крајот од сезоната. И во двата Ел Класикоа, во финалето на Купот на кралот и во реваншот од четвртфиналето на Лигата на шампионите против Арсенал, Модриќ не беше во почетниот состав – а Реал ги загуби сите тие натпревари.
Во меѓувреме, клубот се подготвува за големи кадровски промени. Нов тренер ќе биде Чаби Алонсо, а засилувањата веќе се договорени – Трент Александар-Арнолд доаѓа од Ливерпул, Дин Хујсен од Борнмут, додека трансферот на Алваро Карерас од Бенфика е пред завршување. Во овој реконструиран тим, Модриќ повеќе не е дел од плановите на клубот.
Да потсетиме дека Модриќ пристигна во Мадрид во 2012 година од Тотенхем за 35 милиони евра. Во текот на повеќе од една деценија, тој стана легенда на клубот и најтрофејниот играч во неговата историја – освојувајќи 28 трофеи, вклучувајќи шест Лиги на шампиони, четири титули во шпанското првенство и два Купа на кралеви. Тој одигра 590 натпревари за Реал Мадрид, постигнувајќи 43 гола и имајќи 95 асистенции. Иако клубот повеќе не го гледа во своите планови, Модриќ сè уште се надева дека би можел да остане уште една сезона, за да биде подготвен за Светското првенство следната година.
