ОГРАДИСЕ.МК: Политички партии во трка за најубава ограда додека дрогата не признава партиски бои

СКОПЈЕ, ДЕНЕС – Во период кога цената на градежните материјали достигнува рекордни нивоа, две најголеми политички партии во земјава започнаа невидена инвестиција во “огради” и “оградувања”, создавајќи нов национален спорт.

ВМРО-ДПМНЕ денеска официјално повика СДСМ да се “огради” од својот член-наркодилер кој, замислете, се фотографирал со претседателот на партијата Венко Филипче. Портпаролот на ВМРО-ДПМНЕ изјави: “Бараме оградување по сите стандарди на НАТО, минимум два метри висина, со бодликава жица на врвот!”

Само неколку часови подоцна, СДСМ возврати со свое соопштение: “Го повикуваме ВМРО-ДПМНЕ итно да се огради од нивниот член-наркодилер! И тоа не со обична ограда, туку со Берлински ѕид помеѓу нив!”

- Advertisement -

Портпаролот на ВМРО-ДПМНЕ веднаш одговори: “Нашата ограда ќе биде поголема од нивната! И ќе биде во партиските бои!”

Во меѓувреме, службата за борба против наркотици известува дека различните видови дрога се пораспространети од леб во продавниците, но за тоа никој нема време да зборува бидејќи сите се зафатени со проектирање на огради.

“Кокаинот не гласа ни за ВМРО-ДПМНЕ ни за СДСМ, но затоа нашите корисници одлично гласаат за кого ќе им кажеме,” изјави анонимен наркодилер за нашата редакција. “Додека политичарите се оградуваат едни од други, ние правиме одлична соработка со сите партии.”

Според најновите истражувања, 78% од партиските членови сметаат дека оградувањето од сопствените членови е поефикасно од борбата против нарко-мафијата. “Зошто да се бориме против дрогата кога можеме едноставно да се оградиме од тие што ја продаваат и да се правиме дека не ги познаваме?” прокоментира еден анонимен политичар.

Министерството за внатрешни работи соопшти дека поради зголемената побарувачка за огради, полицијата привремено ја прекинува борбата против нарко-криминалот за да помогне во изградбата на политички огради.

“Во моментов имаме повеќе фотографии од политичари со наркодилери отколку заплени на дрога,” изјави еден полициски инспектор кој сакаше да остане анонимен. “Но тоа е нормално, бидејќи политичарите и дилерите се среќаваат на истите забави.”

Експертите за градежништво предвидуваат дека доколку двете партии продолжат со ова темпо на оградување, до крајот на годината целата држава ќе биде испресечена со огради, создавајќи уникатен лавиринт од политички демаркациони линии.

“Крајно време е некој да постави прашање: оградите ги чуваат дилерите надвор од партиите или партиите надвор од дилерите?” запраша еден политички аналитичар. “Или можеби ги штитат граѓаните од двете?”

Додека политичките партии продолжуваат да се натпреваруваат која ќе изгради повисока ограда, наркодилерите инвестираат во скали – виножито од можности за премостување на секоја политичка бариера.

Пародичен критички текст

Сашо Денесовски