Палестинското исламистичко движење Хамас повеќе не гледа смисла во нови мировни преговори со Израел, изјави висок претставник на движењето, еден ден откако израелскиот кабинет за безбедност одобри план за проширување на воените операции во Газа. Тој ја повика меѓународната заедница да изврши притисок врз Израел.
„Нема смисла да се продолжуваат разговорите или да се разгледуваат нови предлози за прекин на огнот сè додека војната на гладот и истребувањето продолжува во Појасот Газа“, изјави портпаролот на Хамас, Басем Наим, за француската новинска агенција АФП.
Според член на политичкото раководство на Хамас, светот треба да изврши притисок врз владата на премиерот Бенјамин Нетанјаху да ги прекине „злосторствата на глад, жед и убивање“.
Претходно во понеделник, Израел објави дека одобрил воени планови за проширување на операциите во Газа, кои, според еден висок функционер, би вклучувале раселување на поголемиот дел од населението и заземање и контрола на областа.
Армијата веќе почна да испраќа повици до илјадници резервисти.
Загриженост и критики за плановите на Израел изразија неколку земји и организации, вклучувајќи ги ЕУ и Обединетите нации.
Од почетокот на војната во Газа, предизвикана од нападот на Хамас на 7 октомври 2023 година, речиси сите жители на енклавата се раселени, некои и повеќе пати. Во март, Израел воведе целосна блокада на Газа, која се соочува со тешка хуманитарна криза.
Израелската армија ја продолжи офанзивата врз Газа на 18 март, откако пропадна двомесечното примирје. Индиректните разговори за нов прекин на огнот се во ќорсокак.
