Порака од ЕУ по повод Светскиот ден на слободата на медиумите

Слободата на медиумите е ‘рбетот на демократијата, но денес таа се соочува со опасни предизвици – дури и во срцето на Европа. Ова беше централната порака по повод Светскиот ден на слободата на медиумите од европските институции.

„Рамнодушноста не е опција“, предупреди Сабине Верхајен од Европскиот парламент, повикувајќи на постојана будност и активна заштита на медиумите.

Три важни комитети на ЕП – за граѓански слободи, човекови права и демократскиот штит – остро ги осудија нападите врз новинари, произволните притвори, вознемирувањата и тенденциозните тужби. Според заедничката изјава, овие напади се директен удар врз основните европски вредности и мора да бидат санкционирани, вклучително и од страна на меѓународните судови.

- Advertisement -

Загрижувачки е и порастот на дезинформации и манипулации преку социјалните мрежи, особено кај младите. Нела Рил, претседателка на Комитетот за култура, предупреди дека новинарите се принудени да се натпреваруваат со алгоритми, што ја поткопува јавната доверба. Таа посочи дека мора да се подобри медиумската писменост и пристапот до проверени информации.

Европската комисија потсети дека Европскиот закон за слобода на медиумите, кој стапува во сила во август, ќе овозможи подобра заштита за независните медиуми. Според извршната потпретседателка Хена Виркунен, Европа мора да остане светилник за слободата на изразување и медиумскиот плурализам.

Во време на ерозија на демократските норми, потсетуваат европратениците, новинарите остануваат последната линија на одбрана. Тие се чувари на вистината, одговорноста и правдата – и токму затоа мора да бидат заштитени. Не само денес, туку секој ден.