Тинејџер кој си ги убил мајката и очувот и живеел со нивните тела, планирал да го убие американскиот претседател Доналд Трамп, се вели во судски документ на ФБИ. Истражителите во домот на 17-годишник од државата Висконсин во САД нашле манифест во кој се повикува на атентат врз Трамп со цел да се предизвика расна војна.
Осомничениот Никита Касап од Ваукеша веќе делумно платил за „дрон со механизам за ослободување на товар“, кој планирал да го користи за фрлање експлозиви, молотови коктели или моќен отров на цели, јавува Би-Би-Си.
„Убиството на родителите очигледно беше обид да се обезбедат финансиски средства и слобода неопходни за извршување на неговиот план“, се вели во изјавата.
Касап беше уапсен на 28 февруари, откако не застана на знакот за стоп додека го возеше Фолксваген атласот на неговиот очув во Векини, Канзас, на речиси 1.300 километри од местото каде што живеел. Во автомобилот биле пронајдени пиштолот Смит и Весон 357 магнум на очувот, личните документи на жртвите и чаурите.
Тинејџерот се појави на суд на 27 март, кога беше откриено дека телото на неговата мајка е пронајдено во ходникот покриено со ќебиња и крпа, а телото на неговиот очув е пронајдено во канцеларијата на долниот кат од куќата, покриено со куп алишта.
Касап ги споделил своите планови со другите на Тик-ток и на Телеграм и се идентификувал како следбеник на Редот на деветте агли, група која ФБИ ја опишува како неонацистички култ што „заговара насилство и тероризам за да се соборат владите и да се уништи модерната цивилизација“.
