Американскиот актер, Ерик Дејн, познат по својата улога во ТВ-серијата „Вовед во анатомија“ (Grey’s Anatomy), откри дека боледува од амиотрофична латерална склероза (АЛС). Станува збор за невролошко заболување на мускулите и засега нема познат лек за таа болест.
– Дијагностициран ми е АЛС. Благодарен сум што го имам моето прекрасно семејство покрај мене додека го почнуваме ова ново поглавје во животот. Љубезно ве молам да ми дозволите мене и на моето семејство малку приватност – изјави актерот за Пипл.
Дејн, кој има 52 години, потврди и дека следната недела ќе почне со снимање на третата сезона на „Еуфорија“, во продукција на ХБО, каде што го глуми ликот Кал Џејкобс.
Дејн е во брак со Ребека Гејхарт, со која се венчаа во 2004 година. Гејхарт поднесе барање за развод во февруари 2018 година, но неодамна открија дека одлучиле да се откажат од разводот. Заедно имаат 2 ќерки, 15-годишната Били и 13-годишната Џорџија.
