Неколку лица се повредени во новите руски напади врз Украина

Најмалку 21 лице е повредено во нови напади со руски беспилотни летала врз Украина во текот на ноќта во неколку украински градови. Русија ја нападна Украина со 55 беспилотни летала, а украинската противвоздушна одбрана соопшти дека соборила 32 од нив, пренесе француската новинска агенција АФП.

Во градот Днипро во југоисточна Украина напад со дрон оштети неколку станбени згради и повреди 14 лица, од кои едно потешко, објави гувернерот Сергеј Лисак на Телеграма. Според градоначалникот на Днепро, Борис Филатов, пет станбени блокови биле цел на нападите.

Најмалку три лица, меѓу кои и едно 11-годишно дете, се повредени во „масивен напад на руски беспилотни летала“ во Краматорск во југоисточна Украина, соопштија локалните власти.

- Advertisement -

Во Харков на истокот на земјата три лица се повредени во напад на дваесетина руски беспилотни летала врз станбени згради и индустриски објекти, соопшти регионалното обвинителство.

Руското Министерство за одбрана, пак, објави дека соборило 158 украински беспилотни летала над западниот и јужниот дел на земјата.

Украинскиот претседател Володимир Зеленски предупреди по петочниот руски напад на Криви Рих, во кој загинаа 20 лица, меѓу кои девет деца, дека се зголемува бројот на руските воздушни напади врз Украина, што според него покажува дека меѓународниот притисок врз Москва е недоволен и дека Русија не сака прекин на огнот. Тој, исто така, изрази жалење поради недостатокот на американски одговор на отфрлањето на Москва за прекинот на огнот во Украина.

Москва нагласува дека го поддржува договорот за прекин на огнот во Украина, но укажува на неодговорени прашања во однос на спроведувањето на договорот. Како што продолжуваат нападите врз Украина, Кремљ тврди дека руските сили не ја гаѓаат цивилната инфраструктура.