Младиот Јован Костадинов се врати дома по трагедијата во „Пулс“

Во Гимназијата „Ванчо Прке“ во Виница денеска одекнуваа громогласни аплаузи. Нив ги доби Јован Костадинов – 19-годишното момче чие име овие денови се изговара со почит и восхит. Негови соученици, наставници и пријатели го дочекаа со топл0 добредојде, по враќањето од болничко лекување по кобната вечер во дискотеката „Пулс“ во Кочани.

Но, Јован не е само преживеан во трагедијата – тој е херојот кој во ноќта на 16 март, кога пожарот одзеде 59 млади животи, не мислеше само на себе. Соочен со пламените јазици, тој покажал огромна храброст, помагајќи на други млади да излезат од огнената стапица.

Неговиот подвиг не остана незабележан. Овие денови, неговото име се споменува со длабока почит на социјалните мрежи, а неговата несебичност е инспирација за многумина.

- Advertisement -

„Херојството не се мери со години, туку со храброст и човечност ! Јован од Виница 19-годишно момче , симбол на несебична пожртвуваност кога во пожарот во Кочани , без двоумење , влезе во огнот за да спаси околу 20 деца! Со црево во рацете и срце полно со храброст, тој не размислуваше за себе, туку за оние на кој им беше потребен ! Побрзо оздравување Јован“, пишува на социјалните мрежи.

Јован беше пуштен на домашно лекување откако лежеше на Клиниката за токсикологија, каде што ќе продолжи неговата борба за целосно заздравување. Но, денеска, во своето училиште, доби она што најмногу му требаше – поддршка, љубов и признание за своето големо срце.