Унгарскиот премиер Виктор Орбан денеска изјави дека земјата е подготвена да учествува во финансирањето на заедничката европска одбранбена политика, но дека се противи ЕУ да се задолжува за таа цел.
– Ова прашање може да биде клучна тема на самитот на лидерите на ЕУ следната недела, каде се очекуваат „тешки“ преговори, – изјави Орбан за државното радио, пренесе Блумберг.
Пратениците од партијата на Орбан вметнаа одредба во уставот на Унгарија со која е потребно двотретинско мнозинство во парламентот за да се одобри заедничкото финансирање од ЕУ. Орбан најави дека ќе ги повика пратениците да гласаат против предлогот на седницата закажана пред почетокот на самитот на ЕУ на 20 март.
Дипломатската служба на ЕУ во понеделникот предложи земјите-членки на блокот да обезбедат до 40 милијарди евра воена помош за Украина оваа година, според документот што го видел Ројтерс. Како што е наведено, секоја земја-членка на ЕУ која учествува во донациите треба да придонесе „во согласност со своите економски можности“.
