Млазен мотор на авион на Американ ерлајнс се запалил откако авионот морал принудно да слета во Денвер во четвртокот, принудувајќи ги патниците да се евакуираат користејќи тобогани, соопшти Федералната управа за авијација (ФАА).
Авиокомпанијата потврди дека сите 172 патници и шесте членови на екипажот можеле безбедно да го напуштат авионот, иако шест патници потоа биле пренесени во локалната болница на дополнителни испитувања.
Летот 1006 на Американ Ерлајнс од Колорадо Спрингс до Далас, кој превезуваше патници во Боинг 737-800, слета во Денвер откако екипажот се пожали на вибрации на моторот, соопшти ФАА.
На социјалните мрежи е објавена драматична снимка од патниците кои стојат на крилото на авионот пред да бидат евакуирани, додека од моторот се извива густ чад.
Американ ерлајнс изјави дека авионот слетал безбедно и пристигнал на аеродромот, но потоа доживеал „проблем поврзан со моторот“.
Според сајтот за следење летови FlightRadar24, 13-годишниот авион бил опремен со два мотори CFM56, произведени во соработка помеѓу GE и Safran.
ФАА најави истрага за инцидентот. Портпаролот на меѓународниот аеродром во Денвер потврди дека пожарот е изгаснат и дека летовите продолжиле без прекин.
Боинг одби да го коментира инцидентот и ги префрли сите прашања до Американ ерлајнс и истражителите. GE сè уште не одговорил на барањето за коментар.
Овој инцидент е само еден во низата неодамнешни проблеми во американската воздухопловна индустрија, кои ја доведоа во прашање безбедноста на воздушниот сообраќај. Меѓу нив е и судирот на регионалниот авион на Американ ерлајнс со воен хеликоптер на 29 јануари, во кој загинаа 67 лица.
Минатиот месец регионален авион на „Делта ерлајнс“ се преврте на покривот при слетување на аеродромот во Торонто поради силните ветришта по снежната бура, при што беа повредени 18 од 80 патници во авионот, но сите преживеаја.
Извршниот директор на „Американ ерлајнс“, Роберт Исом и извршниот директор на „Делта ерлајнс“, Ед Бастијан, во вторникот изјавија дека неодамнешните авионски инциденти, заедно со тешките временски услови и економската несигурност, негативно влијаеле на побарувачката за патувања во САД.
