Глобалната понуда на нафта во 2025 година би можела да ја надмине побарувачката за околу 600.000 барели дневно

Глобалната понуда на нафта во 2025 година би можела да ја надмине побарувачката за околу 600.000 барели дневно, се вели во месечниот извештај објавен денеска од Меѓународната агенција за енергија (ИЕА).

„Пазарниот суфицит би можел да порасне за дополнителни 400.000 барели дневно доколку нафтениот картел ОПЕК + ги продолжи доброволните намалувања на производството и не успее да го ограничи вишокот на производство во однос на квотите“, соопшти агенцијата со седиште во Париз.

ИЕА ја ревидираше надолу својата прогноза за раст на побарувачката на нафта во 2025 година за 70.000 барели дневно на околу 1 милион барели дневно, додавајќи дека растот во голема мера е поттикнат од Азија, особено од кинеската петрохемиска индустрија.

- Advertisement -

Во извештајот се забележува дека побарувачката во последниот квартал од 2024 година и првиот квартал од оваа година била под очекувањата поради „невообичаено неизвесната макроекономска клима“.

Ризиците за изгледите на пазарот остануваат присутни, а несигурностите изобилуваат, бидејќи има голема несигурност во однос на американските тарифи и реципрочни мерки, се додава во извештајот.