Македонскиот репрезентативец во нордиско скијање, Ставре Јада, стана првиот македонски спортист што обезбеди пласман на Зимските олимписки игри 2026 во Милано.
Тој ја осигура квотата со својот настап на Светското првенство во нордиско скијање што се одржува во Трондхејм, Норвешка.
Јада на 27 февруари настапи во квалификациската трка и заврши на 126-то место од вкупно 182 натпреварувачи. Во дисциплината 10 км класичен стил тој се пласираше на 107-то место, додека вчера, во тимскиот спринт на 1.3 км, оствари одличен резултат и се најде на 41-то место.
„Како наш претставник на FIS Светското првенство во нордиско скијање, кое се одржува од 26 февруари до 9 март во Трондхејм, Норвешка, Ставре Јада успеа да обезбеди квота за Зимските Олимписки Игри 2026 во Милано – натпреварот од соништата на секој спортист“, соопштија од Скијачката федерација на Македонија.
Со овој успех, Јада станува првиот македонски скијач што си обезбеди место на претстојната Олимпијада.
