Грчкиот парламент ја одобри истрагата за помошникот на премиерот за железничка несреќа

Грчкиот парламент во вторникот го потврди формирањето на истражен комитет за утврдување на можната кривична одговорност на близок соработник на премиерот Киријакос Мицотакис. Тој е обвинет за уништување докази за железничката несреќа во Лариса во 2023 година, во која загинаа 57 лица.

Грчката опозиција се обедини во остри критики и на владата и на поранешниот државен секретар во кабинетот на премиерот, Христос Триантопулос, обвинувајќи ги за одговорност за „двојно злосторство“ – и за самата трагедија и за наводното уништување на важни докази по несреќата, пренесува француската новинска агенција АФП.

Триантопулос е обвинет дека одобрил брзо отстранување на последиците од несреќата, што доведе до уништување на доказите. Поранешниот државен секретар ги отфрла обвинувањата и тврди дека сите одлуки во врска со местото на трагедијата биле донесени „исклучиво од оперативните и административните органи пред доаѓањето на владината делегација“.

- Advertisement -

Се очекува денеска опозициските партии Пасок, Сириза и уште две помали левичарски партии да поднесат барање за недоверба на конзервативната влада.

325.000 луѓе се собраа на протести низ Грција минатата недела за да ја одбележат втората годишнина од најголемата железничка катастрофа во историјата на земјата. Најголем број, околу 200.000, се собраа пред парламентот во Атина, каде што избија немири.

Анкетите покажуваат дека повеќето Грци веруваат дека официјални лица прикриле важни докази по несреќата, забавувајќи ја истрагата, која сè уште е во тек.

Обвинети се повеќе од 40 лица, вклучително и управителот на локалната станица кој беше одговорен за насочување на возовите, но судењето не се очекува пред крајот на годината. Владата, пак, ги отфрла обвинувањата на опозицијата дека стои зад „организиран план“ за заштита на високи функционери од одговорност.

Несреќата се случи на 28 февруари 2023 година, кога товарен и патнички воз, со повеќе од 350 луѓе, главно студенти, се судрија во близина на тунел северно од Лариса.